Timlilit tussnant taɣelnawt ɣef Matub Lwennas

---

---

I lmend n usmekti n umulli wis 63 n tlalit n umedyaz d ucennay neɣ anaẓur aqbayli amḥaddi Lwennas Matub, thegga-d tesdawit n Mulud Mɛemmeri n Tizi Uzzu yiwet n temlilit tussnant taɣelnawt, ara yeddun ɣef teɣzi n sin wussan-agi.

Ad tebdu s wudem unṣib seldazekka n larebɛa 23 yennayer 2019, ad tessali azekka-in n lexmis 24 deg waggur-agi ideg nella. D tazeqqa n yisaragen n tesdawit Ḥesnawa, ideg ara d-tili temlilit-agi tameqqrant ara yilin d tajmilt i urgaz-a yefnan tudert-is i uẓar amaziɣ.

D timlilit ara d-yawin awal ɣef tudert neɣ tameddurt n Lwennas Matub, gar tnagiyin d temsal yerzan timeɣnest-ines ɣef tmagit d yidles amaziɣ akked yizerfan n umdan. Ad ilin daɣen yisaragen ɣef tmedyazt-is d yisefra-s, ama s tezrawin n unadi neɣ s tselḍin n yimussnawen n tmedyazt. Am wakken diɣ ara d-ilin yisaragen ɣef uẓawan akked ccna n uḥeddad n wawal aqbayli, yefkan tudert-is d yiman-is d asfel ɣef tmurt n Leqbayel.

Yetturaǧu ad d-ilin wazal 34 n yisaragen sɣur ugar n 40 n yimussnawen d yiprufisuren akked yidukturen n tesdawiyin n tmurt. Amur ameqqran n yimsaragen, ad ilin seg tesdawit n Tizi Uzzu, ɣef wakken i t-id-yenna Mass chemakh Said i yellan d aselway n teseqqamut tussnant n temlilit-a. Yenna-d: “Mi ara texdem tesdawit kra n temlilit, ilaq ad tesban tizemmar d tmussniwin n yimussnawen d yimnadiyen-is…”.

Ad yili umeslay s telqayt deg teywalin d yisaragen n temlilit-agi, ama ɣef wayen i d-yewwi d amaynut deg uẓawan n cceɛbi, ama ɣef umawal yesseqdac deg tezlatin-is. D tasleḍt n tmedyazt-is s tussniwin yemxalafen ara yawin aḥric ameqqran deg yisaragen-agi (tasimuntikt, tasekla…). Am wakken daɣen, ara d-yili wawal ɣef tmeddurt-is, d tira-ines n udlis-nni “Aɣewway”…atg. Am wakken diɣ i yetturaǧu ad as-yettunefk warraz n usmekti, ass n lexmis 24 deg yennayer 2019. Imi ɣef wakken i t-id-yenna uduktur Said Chemakh:

“Ur nezmir ara ad as-nefk arraz Docteur Honoris Causa, am winna i d as-nefka i Lewnis At Mengellat. Imi Matub, ulac-it gar-nneɣ. Dɣa, ad as-nefk arraz-agi n usmekti, i lmend n wayen i d-yefka d agerruj i yidles amaziɣ”. D Mass Ahmed Tessa, imḍebber amezwaru n tesdawit n Tizi Uzzu, ara yilin d aselway n yiseɣ n temlilit-agi tussnant. Ma d aselway n temlilit, ad yili d Mass Moussa Imarazene, imḍebber n tezdayt n tsekliwin d tutlayin n tesdawit n Tizi Uzzu.

Iswi d umaynut n temlilit-a

Ma d iswi n temlilit-agi, ɣef wakken i t-id-nnan yimsuddsen-agi deg wulɣu-nni n temlilit, ad yili d asissen iwatan ɣef wayen akk i d-yefka d wayen i d-yeǧǧa Matub, ama d tamedyazt, ama d aẓawan neɣ d isental iɣef yessefra akked talɣiwin swayes yessefra…atg.

D tagnit ara d-yesddukklen imussnawen d yiselmaden d wid yakk iḥemmlen Lwennas. D tagnit daɣen n tmussni d tussna, imi ad yili ubeddel n tmuɣliwin d tmussniwin ɣef urgaz-agi ameqqran. Ma ɣef umaynut n temlilit-agi, iberreḥ-d Mass Chemakh: “Ad d-ilint tɣuriwin timaynutin ɣef tmedyazt d ccna n Matub Lewnnas, ɣer tama n waṭas n umaynut-nniḍen i yetturaǧun ad yili deg temlilit-a.

Gar-asen arraz-agi n usmekti…”. Ma ɣef tegnatin ideg yetturaǧun ad tili temlilit-agi, ikemmel yenna-d umsasten-nneɣ: “Merra tignatin d ttawilat, ttwaheggan sɣur imḍebber amezwaru n tesdawit n Tizi Uzzu Mass Ahmed Tessa. Yetturaǧu ad tɛeddi deg tegnatin yelhan”. Ad d-nesmekti kan, belli tella-d yakan yiwet n temlilit tussnant tagraɣlant i d-yellan ɣef leqdic-is deg tesdawit n Abderrahmane Mira n Bgayet deg wussan n 19, 20 akked 21 yunyu 2018.

Adaoun Abdelghani

---