Ass n tezrawt ɣef Haman Abdellah



...

Yekfa usfugel n yennayer deg Wehran s yiwen n wass n tezrawt seg tnezzayt armi d tameddit, ass-nni n arim 14 yennayer, ɣef yiwen wudem, mačči aṭas-aya segmi i aɣ-yeǧǧa. D udem n tegrawla, n tsekla, n tira, n umezgun d tmedyazt, wagi d Abdellah Haman.

Tafaska i d-thegga tddukkla Numidya aseggas-a i lmend n yennayer, tettwabud-as i rruḥ-is, ma neẓra d akken aṭas i yeqdec daxel, rnu d yiwen seg wid i d-yeslulen tiddukkla-a ɣer tama n umussnaw Kamal Uzerrad. Dɣa deg Uxxam n uɣmis El Ǧumhurya i as-tuɣal tejmilt i yuklal.

Aṭas n wudmawen i yellan din, gar-asen amaray amatu n Useqqamu unnig n timmuzɣa Ɛessad, kra n yiselmaden n tesdawit, ma nebder-d kan Buǧemɛa Ɛezziri, Meqqran Cixi, Crifa Bilak. Anemhal n uɣmis El Ǧumhurya, d uselway n tddukkla Numidya d yiɛeggalen-nniḍen am Ǧamal Benɛuf, Hewwari Bessay d Nadya Bennaɛmer, Saɛid Zeɛnun, tawacult d yimeddukkal n Dda Ɛebḍella d waṭas n yimdanen-nniḍen.

Yebda leqdic s umeslay n yal win i t-yessnen, yefka-d tamuɣli wezzilen fell-as. Umbeɛd, yella-d usenɛet n yiqeddicen yakk i d-yeǧǧa (19 n leqdicat, gar wungalen, ammuden, tisuqqilin d tmucuha). Syin, tella-d tɣuri n kra n yisefra-s sɣur imeddukkal n Numidya. Ar taggara, d tukci n warraz n yiseɣ sɣur Aseqqamu unnig n timmuzɣa d uɣmis El Ǧumhurya i twacult n Ḥaman deg tegnatin n lferḥ igerrzen.

Wid akk i d-yemmeslayen, mwatan d akken yiwen am Dda Ɛebḍella, d udem ur nettwattuy ara, acku d agerruj mucaɛen i d-yeǧǧa deffir-s i yidles n tmaziɣt, war ma nettu daɣen d udem n tegrawla, imi d amjahed i yekkin deg tegrawla deg tama n umalu, akken ad d-tḥelli tmurt timunent-is. Yettwaṭṭef di Sidi Belɛebbas, aseggas n 1957, yeḥkem fell-as s lḥebs s 20 n yiseggasen, armi d timunent i d-yeffeɣ.

Uqbel ad yerr akud-is i lxedma n lexyaḍa akken ad yessider tawacult-is akked leqdic war aḥbas ɣef yidles amaziɣ seg yiseggasen n 1960. Rnan nna-d, d akken Ḥaman d tmital-is d imedyaten i tsutwin i d-yettnekkaren, s ugerruj adelsan i d-yeǧǧa d tebɣest yesɛa ɣef leḥmala n tmurt-is, ɣef waya i ilaq ad yili usidef n yiqeddicen-is ɣer wahilen n uɣerbaz neɣ n tesdawit, ma neẓra belli d lfayda ara d-agmen seg-sen.

D asmekti kan, imi yella-d usemmi n yiwen n uɣerbaz alemmas ɣef yisem-is, ahat d isalli n tumert ara t-yeǧǧen ad igen u ad yesteɛfu di talwit. Tefreḥ nezzeh twacult-is, tameṭṭut-is d warraw-is s usmekti meqqran am wa, ladɣa imi i d-yusa deg lawan n usfugel n useggas amaynut n yimaziɣen, yennayer. Tanemmirt daɣen tettuɣal i unemhal n uɣmis El Ǧumhurya, i yettilin yal tikkelt di ttiɛad mi ara terzu temsalt idles d tutlayt n tmaziɣt, s tumert i d-yettelday tiwwura n uɣmis i leqdicat am wigi.

Khaled Achoui


Lire la suite sur La Dépêche de Kabylie.

Publier des annonces gratuites

Petites annonces Babalweb Annonces

Publier une annonce gratuite

Autres sites

Sciencedz.net : le site des sciences
Le site des sciences en Algérie


Vous cherchez un emploi? Essayer la recherche d'emploi en Algérie
Babalweb Annonces Babalweb Annonces
Petites annonces gratuites