Tlul-d tddukkla n yimawlan n yinelmaden

Deg umenzu n waggur n furar n 2019, tettwaxleq-d yiwet n tddukkla tamaynut n yimawlan n yinelmaden n yiɣerbazen imenza n taddart At Zεim I d At Zεim II. Yeḍra-d waya s tallelt n teseqqamut n taddart, yettabaεen ɣer tɣiwant n Mεatqa. Ɣas ma drus n wussan seg-mi i d-tlul tddukkla-agi, meɛna aṭas n leqdicat, s wazal-nsen, i d-yettwaxedmen yakan deg unnar.

Dɣa gar yisenfaren imenza ideg i d-tefka tallelt, ad d-nebder asenfar n usekcem n lgaz n temdint ɣer yiɣerbazen, imi tuget n yiεeggalen, fkan-d afus n tallelt deg usenfar-agi akken ad d-sfaydin yinelmaden. Deg tazwara n ddurt iεeddan i sawḍen ad d-caεlen tikuzinin deg yakk tizeɣwa n yiɣerbzen imenza n taddart.

Gar tigawin n tddukkla,daɣen, ad naf awenneε d ugerrez n yiɣerbazen d usizdeg n yimeḍqan n ustaεfu. Aya, yella-d sdat n ustehzi n yimḍebbren teεna temsalt, ama d iεeggalen n Useqqamu aɣerfan aɣiwan n Mεatqa, neɣ Tanmehla n usegmi. Dɣa ɣef lehsab n yimḍebbren, addad-agi iɣer i wweḍen yiɣerbazen, yella-d s ssebba n uɣbel n lexṣas n tedrimt i d-tesseggra taluft n uṣbbu n leswami n bitrul deg leswak n ddunit.

Ssawḍen yiεeggalen n tddukkla s tallelt n yimezdaɣ n taddart n AT Zεim, yal wa s wayen yezmer, i wakken ad d-gerrzen addad n yiɣerbzzen imenza n addart. Ula d tuččit deg tesmaččiwin, bedden fell-as akken iwata s tallelt s tedrimt, imi drus n tedrimt i d- yettunefken seg tɣiwant.

Ali Zalouk