Amyaru yerẓan asalu n tira

Racid Ɛellic, d amyaru i d-ineǧǧren tiregwa n yidles d tira, gar yimenza i irefden imru, ad d-ssenfalin s teqbaylit ɣef teqbaylit, yendeh usafu n tira. Mi akken yeẓra d lawan, tutlayt-agi yesɛan imawlan ad d-tettwakkes seg gar tuccar n tatut. Maca anwi ara tt-id-yekksen, anda-ten wid yesɛan tabɣest. Wigi d timital n Racid Ɛellic d yimeddukkal-is n wat wawal n tallit-nni ideg leḥris yezga ɣef kra n win yellan d amaziɣ. D Ɛmer Mezdad, d Saɛid Seɛdi, d Dda Lmulud, d Ben Muḥemmed, d Belḥanafi, d wiyaḍ d wiyaḍ i yerẓan asalu, akken ass-a ad nwali adlis d yidles, bdan ttaṭṭafen amkan-nsen gar wiyeḍnin. S wungal Asfel i yebna aẓru n llsas i swayes i d-yefka beddu akken ad d-ḍefren wayetma-s. Ass-a wwḍen 11 d aseggas segmi i aɣ-yeǧǧa, maca s wayen i d-yeǧǧa, nettwali-t gar-aneɣ yella. Ilul Racid Ɛellic deg useggas n 1953 deg taddart n Tagemmunt Ɛezzuz, taɣiwant At Meḥmud deg Wat Dwala. D amyaru, d aneggal, yexdem daɣen deg umaṭṭaf aɣelnaw wis sin tidwilin s teqbaylit d temsirin n tmaziɣt i warrac imeẓyanen. Yura sin n wungalen, Asfel (1981), yis-s i yerẓa asalu i wungal yettwarun s tmaziɣt. Yis-s i d-yessebgen idles n tira, yewwi-d tamuɣli d wudem imaynuten i tsekla tamaziɣt. Yura daɣen ungal Faffa (1986). Dda Racid ɣur-s agerdas deg taɣult n tfizikt, maca yefren ad iḥareb ɣef tutlayt-is, ɣef tgemmi i swayes i d-yekker di taddart-is akked tmetti taqbaylit s umata. Yemmut ass n 18 meɣrs 2008 deg tmanaɣt. Kh. A