Gezmen abrid yinelmaden n tesdawit n USTO

Ffɣen-d ɣer ubrid kra n yinelmaden n tesdawit n Muḥemmed Buḍyaf USTO, bedden ɣer tama n tewwurt n unekcum, qqimen akken deg ubrid, yettwagzem i wazal n tsaɛet, ass-nni n arim ɣef 10H n ṣṣbeḥ, mbeɛd amsefham i d-yellan gar-asen iḍelli-nni. Tikkelt-a mačči ɣef udabu i d-ffɣen, maca ffɣen-d ad ccetkin ɣef waddad uɣur yessaweḍ umesni azayez (transport public), s tazzla d tuffɣa n leɛqel n yinehharen n yifurguten ladɣa uṭṭunen 11 d 51 i yettɛeddayen syin yal tasdidt, u d wid i yettazzalen mačči d kra.

D ayen i swayes i d-yeglan s twaɣit i d-yeḍran sin n wussan uqbel tuffɣa-a n yisdawanen, yeɛni ass n sed, 25 maggu 2019, myeckaḍen sin n yifurguten i d-yewwin zzedwa meqqren, dɣa jerḥen 13 n yimdanen ara yesɛun gar 12 d 52 n yiseggasen, kraḍ deg-sen ssuffɣen tarwiḥt di sbiṭer azekka-nni imi nṭerren nezzeh. Akka i t-id-ssawḍen wallalen n temselɣa azekka-nni. Dɣa d lɣiḍ meqqren i d-tessegra tedyant-a, ama ɣer twaculin n yiseflan, ama ɣer yimdanen-nniḍen, ladɣa wid irekkben yal ass ifurguten-a. Gar yisuturen n yinelmaden ad naf, “Ala i yifurguten n lmut”.

Am yinehharen, am wid i ten-yettɛawanen daxel, ixeznaǧiyen (receveurs), tuget-nsen d ilmeẓyen ur ttawḍen ara 35 n yiseggasen, tessen ula d ayen yemneɛ usaḍuf, imi ulac atabeɛ (le controle). Rnu, ur ttqadaren ara isuḍaf n tikli deg ubrid, lhem-nsen d ajmaɛ n udrim, ttgen timsizzlin gar-asen anwa ara yawḍen ɣer usebdad d amezwaru. Tturaren s terwiḥin n medden, ur cliɛen ara. Inelmaden-a i d-yeffɣen ad d-inin “Berka i timmuhbelt yecban tagi, zwiret leɛqel deg uxeddim-nwen, sqenɛet s wayen ilaqen”. Uran tabrat i tenmehla n usiweḍ n twilayt n Wehran, deg-s ssutren ad yili uḥbas n yakk ifurguten usligen deg temdint n Wehran, ad d-rren deg wadeg-nsen takebbanit n ddewla ITO i yettqadaren isuḍaf n tenhart.

Khaled Achoui.