D iseggasen-aya segmi ttcektin yimezdaɣ

Am ṣbiṭeṛ n Xeṛṛaṭa, am win n Umrij, i yettabaεen ɣer tɣiwant n Iderginen, d yiwen n uεekkaz i ten-yewten.

Ayagi imi, d iseggasen-aya, ineggura-a ur ksiben ara amsujji uzzig n tarrawt n tlawin. Azal n semmus n tɣiwanin i irezzun ɣeṛ ṣbiṭeṛ-a, deg-sent tin n At Smaεel, Draε Lqayed, Taṣexṛiwt, Xeṛṛaṭa akked Iderginen. Neɣ s unamek-nniḍen, ugar n 100 000 n yimezdaɣ i irezzun ɣeṛ dinna.

Ad d-nesmekti d akken, aɣbel ur yelli d amaynut. Imi acḥal-ayagi segmi i ceyyεen yimezdaɣ tabrat i yimassayen n tdawsa di twilayt n Bgayet. Lameεna nutni, sεuzzgen imeẓẓuɣen-nsen ɣef taluft. Yerna tamsalt, mačči d tin i d-yewwi ɣef yiwen ad yestehzi deg-s. Ladɣa imi d tudert n umdan i yellan deg turart.

Seg yiwet n tama, amahi d ageεmir ɣef tmeṭṭut i yellan s tadist, acku mi ara ad d-yelḥeq lawan n tarrawt-is, ilaq ad tt-refden imir-n. Meḥsub taklinikt n tarrawt-is, ilaq ad tili teqreb ɣer wadeg n tnezduɣt-is. Lameεna, tullas n temnaḍin-a, d anemgal, imi beεdent mliḥ ɣef ṣbiṭeṛ anda i rezzunt. Acku ilaq ad ṛuḥent alamma d ṣbiṭeṛ n Terga Uzemmur, i yeggugen ugar n 80 n yikilumiṭṛen ɣef tuddar-nsent.

Ihi yal tawaɣit, tezmer ad asen-teḍṛu deg ubrid. Seg tama-nniḍen, d amahi ula ɣef llufan amecṭuḥ deg uεebbuḍ n yemma-s. Ladɣa ma yella ulac ttawilat i iwulmen deg ubrid n tirzin ɣer ṣbiṭeṛ. Di taggara, yewwi-d ɣef yimassayen n tdawsa deg twilayt n Bgayet, ad d-afen tifrat s uɣiwel i temsalt-a. Acku, zzεaf deg wulawen n yibabaten ladɣa, yuli ureqqas-is nezzeh. Daymi i εewwlen ad xeddmen anejmuε sdat n ṣbiṭeṛ n Xeṛṛaṭa. Rnu i waya, ɣef leḥsab n teɣbalut-nneɣ, yetturaǧu ad t-bellεen daɣen, acku mačči d ayen ɣef wacu ara yessusem yiwen.
K. K.