Tamudemt n tfertin n temsirin n Adel Bachouche

Yessuffegh-d uselmad n tmazight Mass Adel Bachouche adlis-is amezwaru i d-yernan d amaynut ɣer temkerdit n tmaziɣt imalas yezrin. Adlis n tikkelt-a mačči d ungal neɣ d ammud n tmedyazt neɣ d adlis n unadi akken nennum idlisen i d-yetteffɣen s tmaziɣt tineggura-a, maca ɣur-s azal meqqren imi yerza aselmed n tmaziɣt. D win iwumi yefka asentel “Tamudemt n tfertin n temsirin”, dɣa imi Adel yesselmad deg ugɣrbaz alemmas, yefren ad yerzu ufaris-is aswir-agi.

Yewwi-d daxel n udlis ɣef wamek yezmer uselmad ad yeg tifert n temsirt s tuddsa, yefren asenfar amezwaru n uswir wis sin (2 ème AM), s rebɛa n tgezmin-is i d-yettmeslayen ɣef “Taynirawt n taddart”, d amedya n tfertin, yezmer ad t-yeḥwiǧ uselmad deg yakk iswiren. Yerna-d kra n yidrisen n yimyura yettwassnen, d amedya, ama d wid i d-yekkes seg yidlisen, seg yiɣmisen neɣ seg tesɣunin. Bla ccek d adlis ideg ara afen yiselmaden abaɣur d kra n tirmiyin, ladɣa iselmaden imaynuen yettnadin amek ara suddsen tifert yelhan i uselmed akken ara as-srun di tneɣrit i tiddin n temsirt akken iwata s tegzi d usiwed n yizen ilaqen i unelmad.

Adlis-a, yeffeɣ-d ɣer tezrigin “El Amel”, yettwasuzer yakan deg waṭas n tamiwin n tmurt n leqbayel. Dɣa d wagi i d iswi akken ara t-afen yiselmaden i t-yeḥwaǧen i usemres deg unnar. Ilul Adel Bachouche deg useggas n 1980 deg tɣiwant n At Mensur (Tubiret), yeɣra tutlayt d yidles n tmaziɣt deg tesdawit n Bgayet. Yewwi-d agerdas n licence aseggas n 2008, dɣa seg yimir, netta yesselmad deg uɣerbaz alemmas, imir-a yesɣaray deg tama n Yighil Ɛli. Ad d-nesmekti daɣen belli d aɛeggal itewlen i ubaɣur d uselmed n tmaziɣt deg uẓeṭṭa inmetti Facebook. Nessaram-as ugar n wafud sya ɣer sdat.

Khaled Achoui